香港新浪網 MySinaBlog
« 上一篇 | 下一篇 »
不敗的魔術師 | 24-Jul-11, 18:49 | 戲劇人生, 社會時事, 中慘世界, 逆流而上 | (655 Reads)

有睇開魔術師個blog嘅朋友,都應該知道魔術師不嬲都對"No risk, No fun"、無無謂謂走去冒險以求自我滿足的西方兒童思想深痛惡絕。今次Danny Boyle繼《28日後(28 Days Later)》同《一百萬零一夜(Slumdog Millionaire)》之後另一「大受好評」之作《127小時(127 Hours)》正正就係提倡呢種自我中心主義,仲要將自己的不知所謂化為正能量,真係睇見都眼火爆:

"Ralston(主角名字) embarks on a remarkable personal journey in which he relies on the memories of family and friends - as well as his own courage and ingenuity - to turn adversity into triumph!"

(以下段落含劇情內容)

本片內容其實都無乜,事發在2003年,講25歲工程師兼自願拯救隊成員的kidult狀主角Aron Ralston又如常地去佢「第二個家」-大陝谷-獨自玩冒險遊,結果呢個「家」似乎唔係好歡迎佢,係佢攀爬途上落下巨石,將其右臂夾在山壁之中。Aron被困127小時,嘗過無數方法脫困皆不果,在水盡糧絕、幻覺頻生的景況下只好強硬拗斷自己臂骨,再用那鈍鈍的國產小刀切斷皮肉,自斷一臂,逃出生天。

Picture

Picture

魔術師睇完之後,毫無半分「對生命的感動」只類的濫情感受,有嘅只係「攞嚟衰」三個字,應咗《恐懼鬥室(Saw)》系列中拼圖殺人魔(Jigsaw)的至理名言:"Those who do not cherish life do not deserve life"。如果主角在2004年有睇《恐懼鬥室》哥頓醫生(Dr. Lawrence Gordon)自行鋸腳一幕,睇怕佢都唔駛考慮咁耐。至於點解主角係「攞嚟衰」?可以話係由家庭教育、國家文化、同社會制度造成:

1. 主角有個衰老豆

主角被困後自忖自己未必有命生還,自不然回憶往事,其中有一幕就係講佢老豆帶佢去大陝谷睇日出。睇嚟點解主角會視大陝谷為「第二個家」,就係因為佢老豆自小培育而成。

Picture

Picture

所以話,家庭教育真係好重要,香港好些中剷家庭讀慣番書大,受西方思想潛移默化,思想同主角一脈相承,8號風球走去衝浪,以為「自己control到個浪」,結果命仔都無埋,連累家人不特上,仲隨時搞到拯救自己的消防蛀人遇險,近年都有唔少案例;最近仲有個成日帶自己個仔去衝擊政府嘅老母,個仔第日大咗會變成點,認真耐人尋味。

2. 主角同家庭關係疏離

就好似而家香港好多80後一樣,主角獨居,喜歡自我空間,連阿媽打電話來都故意唔聽。

Picture

3. 主角性格自我,信心爆棚

主角連阿媽電話都故意唔聽,當然唔會遵照香港政府宣傳片勸喻:同家人講自己會去邊度旅行,仲要結伴同行。主角信心爆棚,處事自然唔認真,出起事來就怨不得人。不過話又說回來,以主角好勝的性格,喜歡臨時抄捷徑以省時間,分分鐘講低咗行程都無用。

 Picture

Picture

4. 主角處事唔認真

話明主角係個kidult,做嘢態度自不然求其是旦。工欲善其事,必先利其器。點解主角背包內得一把隨電筒附送鈍得連皮肉也切不開的國產小刀?

Picture 

佢並唔係無工具,明明有把瑞士名牌Victronix軍刀,但係因為佢出發時只是隨手在櫃內摸幾下,只是掛住帶數碼相機、DV機等無謂嘢,有用的工具小刀呢?摸不到就算了。

 Picture

至於明明帶了運動飲品卻又遺漏在車箱內之顃的烏龍事,對不嬲做事唔認真的主角來說當然只是「小菜一碟」,又點會估到一樽飲品都可以用來吊命?

Picture

5. 自省?

主角最後有所「領悟」,對過於自信作出「懺悔」,自嘲自己可以搞定一切,:

Picture

跟手領悟到自己被困係「宿命」,巨石在大狹谷內等了千萬年就是為了在這刻壓下來而令他「頓悟」。至於英文對白"I chose all of this"係話「我搞成咁,係我自己的選擇」,抑或是如中文字幕所說「我自討的」?魔術師就覺得係前者了:

Picture

Picture

唔好以為主角會改過,佢好明顯係因為面對生死一刻才唔見棺材唔流眼淚,點解咁講,睇埋落去就知。

6. 好彩生在美國

片末謂主角斷臂後娶妻生子,仔細老婆嫩卻依然從事攀山活動,只係會話定路徑俾屋企人知。

 Picture

古人謂「身體髮膚受之父母,不敢毀傷」,又謂「死有輕於鴻毛,有重於泰山」。中國人不嬲都重視自己生命,如果要歌頌犧牲,為嘅都係國家大業,如黃花岡七十二烈士,如樊於期獻首級予荊軻刺秦。西方思想個人主義太濃厚,喜歡以冒險去挑戰自我,對家人的責任感不強。試問挑戰到自我又點呢?佢地唔會想想如果自己有乜損傷,對家庭會有乜嘢打擊,例如自己是否家庭經濟枝柱,層樓又供唔供得掂之類(美國唔通真係無地產霸權?)。可能因為咁嘅呢民族性先搞到次按問題咁嚴重吧?

Picture

***

睇完成套戲,結論就係美國真係一個「充滿愛心的國家」,社會福利好不特止(攀山夠收入養妻活兒,夠供樓?),啲女又唔歧事傷殘人士(港女有可能嗎?),完全係一個平等友愛的社會。香港咁多人不滿政府,好應該考慮下移民去美國。

***

伸延閱讀:

No Risk, No Fun

西方兒童思想

2011/07/24 18:50:48 


[6] Re: 不敗的魔術師
不敗的魔術師 :
係囉, 明明香港政府宣傳片都有講的行山遠足知識, 呢位自命係拯救隊成員的主角竟然要用一隻手去換返嚟!


不過話時話﹐小瓶子小姐一定無讀過四書五經啦﹐禮記有云﹕
為人子者,居不主奧,坐不中席,行不中道,立不中門。食饗不為概,祭祀不為尸。聽於無聲,視於無形。不登高,不臨深。不茍訾,不茍笑。

其實楊威利講的﹐就是幾千年前中國的古代智慧。

文少
[引用] | 作者 文少 | 28-Jul-11 01:37 | [舉報垃圾留言]


愈來愈發覺文少你學識淵博!

又,香港會有幾多人走去讀古文呢?大多數人都只會去讀番書,而番書(尤其是係管理學的書)讀得愈多,真係會愈來愈鈍的。

跌倒了,再爬起,本來就是應有之義,毋需是甚麼大英雄,真好漢。但番書教人對己對人的要求都唔好咁高,處處以寬容角度看事物,自然容易找到正能量。

由此路進,唔可以打罵細路,唔可以打擊自信,下下要讚的幼兒教育,亦係以上正能量思維脈絡的延伸,結果咪培養出無數港孩囉。

[引用版主回覆] | 作者 不敗的魔術師 | 28-Jul-11 10:31

[5] Re: 不敗的魔術師
不敗的魔術師 : 我好多碟都會睇得多過一次,不過除非寫Blog,否則唔會即時重睇。無論我第幾次睇,一旦遇到精采/細節/伏線/爆笑/睇唔明的地方,我都鍾意即時rewind再睇,呢個亦都係我唔鍾意入戲院的原因。睇西片我通常開中文字幕,先睇幾分鐘,如果係譯得好嘅(127算譯得不錯)就會繼續。因為我本身英文對白都聽到七七八八,睇中文字幕一來可以訓練腦力,因為可以即時在腦中對譯,補足埋聽唔到嗰啲;二來如果人地譯得好,可以學下嘢。至於「我自討的」呢句,我當時聽見的是"I chose all of this",覺得唔係咁譯(因為根據當時故事脈絡,主角應係領略「一切都是天意」,恍然大悟;並非完全是懊悔式的「我自討的」的意思),所以先再rewind轉字幕睇多次,最後都係唔同意電影公司咁譯法。同埋,我睇碟通常在廳裡的大電視睇,要截圖才用電腦再播一次,由佢 run,一路打blog一路聽住,去到大概啱嘅位就 cap 圖。細節位方面,真係過獎了。一來我自問觀察力都不錯(例如主角提過自己係志願拯救隊,就解釋了點解佢識得替自己急救包紮,將斷臂掛在頸上,傷口向上,否則一垂低,啲血倒水咁出,即刻無命都似),二來又喜歡一路rewind一路睇,唔明睇到明,所以比其他人留意得多一些也不奇怪。

Great to learn that almost wanted to shout out “Give me FIVE and FIVE and FIVE” immediately!

一定拜讀魔術師全部的影評!


[引用] | 作者 Space | 27-Jul-11 17:33 | [舉報垃圾留言]


唔好俾咁大壓力我好喎!

[引用版主回覆] | 作者 不敗的魔術師 | 27-Jul-11 22:24

[4]

咩叫低成本﹖呢D咪叫低成本囉~~
對美國人﹐唔好要求太高啦
我覺得﹐佢地臨死前識反思一下﹐已經好叻gala

文少
[引用] | 作者 文少 | 27-Jul-11 05:36 | [舉報垃圾留言]

係囉, 明明香港政府宣傳片都有講的行山遠足知識, 呢位自命係拯救隊成員的主角竟然要用一隻手去換返嚟!

[引用版主回覆] | 作者 不敗的魔術師 | 27-Jul-11 22:24

[3]

君所见的和在下不一样, 因此观点南辕北辙.


[引用] | 作者 小瓶子 | 25-Jul-11 20:56 | [舉報垃圾留言]


小瓶子呀小瓶子, 我呢個人不嬲都同社會主流意識持相反意見架喇...

[引用版主回覆] | 作者 不敗的魔術師 | 25-Jul-11 22:13

[2]

八卦問下︰魔術師係咪睇碟通常都睇兩次,一次中文字幕,一次英文字幕?

我見你d captured screens多數都係英文字幕,但又留意到「我自討的」呢句喎!而且好多時都留意到d細節野咁。


[引用] | 作者 太古人 | 25-Jul-11 20:39 | [舉報垃圾留言]


好問題!

我好多碟都會睇得多過一次,不過除非寫Blog,否則唔會即時重睇。無論我第幾次睇,一旦遇到精采/細節/伏線/爆笑/睇唔明的地方,我都鍾意即時rewind再睇,呢個亦都係我唔鍾意入戲院的原因。

睇西片我通常開中文字幕,先睇幾分鐘,如果係譯得好嘅(127算譯得不錯)就會繼續。因為我本身英文對白都聽到七七八八,睇中文字幕一來可以訓練腦力,因為可以即時在腦中對譯,補足埋聽唔到嗰啲;二來如果人地譯得好,可以學下嘢。如果係譯得太差(例如台灣味太重),例如啱啱睇完的《天姬戰(Sucker Punch)》,啲人名譯到非常柒:Babydoll直譯洋娃娃,Sweet Pea譯做小甜荳,High Roller譯浪子,真係睇見都打冷震,所以就會用返英文。又例如一啲用腦扭橋片,和對白字字珠璣的電影,就要睇返英文字幕;例如《恐懼鬥室2》,就玩咗Safe呢個字的雙關:安全(形容詞)和夾萬(名詞),呢類戲就原汁原味睇返英文字幕好啲。

至於「我自討的」呢句,我當時聽見的是"I chose all of this",覺得唔係咁譯(因為根據當時故事脈絡,主角應係領略「一切都是天意」,恍然大悟;並非完全是懊悔式的「我自討的」的意思),所以先再rewind轉字幕睇多次,最後都係唔同意電影公司咁譯法。

同埋,我睇碟通常在廳裡的大電視睇,要截圖才用電腦再播一次,由佢run,一路打blog一路聽住,去到大概啱嘅位就cap 圖。

細節位方面,真係過獎了。一來我自問觀察力都不錯(例如主角提過自己係志願拯救隊,就解釋了點解佢識得替自己急救包紮,將斷臂掛在頸上,傷口向上,否則一垂低,啲血倒水咁出,即刻無命都似),二來又喜歡一路rewind一路睇,唔明睇到明,所以比其他人留意得多一些也不奇怪。

[引用版主回覆] | 作者 不敗的魔術師 | 25-Jul-11 23:05

[1]

这是真人真事改篇的电影.

主角在没有和家人交代及充分准备情况下, 独自去探险, 结果「赖野」他在生死存亡的时候, 深刻地反省了自己的不是之处,到真的能够脱离危险后, 回头说了句谢谢, 这是多么难得的胸襟.

后来主角再从事探险活动, 会比以前作更充分的准备,与家人沟通改善了. 中国人有句话: 「知错能改, 善莫大焉!」

至于魔术师觉得主角还未知错, 还去冒险,我觉得此乃书生之见. 男人那里跌到就在那里爬起. 如果曾经溺水而怕水, 从此不敢游泳, 那是懦弱. 主角如果此事之后就害怕爬山, 那么即是他无法克服断臂的恐惧, 这就成了真正的废人了.

人无完人, 我们很难期望人从来不犯过错. 犯错承受恶果后, 能够爬起身振作, 在我看来已经是相当了不起. 这种真正男子之气, 在香港确实少见.


[引用] | 作者 小瓶子 | 25-Jul-11 10:10 | [舉報垃圾留言]

>主角在没有和家人交代及充分准备情况下, 独自去探险, 结果「赖野」他在生死存亡的时候, 深刻地反省了自己的不是之处,到真的能够脱离危险后, 回头说了句谢谢, 这是多么难得的胸襟.

做好準備,不要獨自冒險,和家人朋友交代清楚去向,這些都是很基本的知識,主角都成25歲,唔係細路仔,又自稱野外冒險經驗豐富,大陜谷是他第二個家,如果咁簡單的事情都要犧牲一條手臂才能明白,那麼佢直程和智障無異。人生有咁多唔同的變數,下下都要瀨鋪勁的才知衰,試問佢有幾多條手腳可以去試?難道真係 common sense is not that common?

古代名將的條件,就是決勝於千里之外,運籌在帷幄之中。士兵是人命,是國家資本,不可動輒犧牲。我地做人亦同樣道理,唔應該將對自已的期望定得太低。下下用人無完人,下次會改善來為自己開脫,那只是自欺欺人之舉。

至於在那裡跌倒,就在那裡爬起,說得對。得都要視乎呢條路係咪有必要去行。我認為主角唔應該再去爬山,唔係高怕左件事,亦唔係話要做懦夫,而係要想清楚,甚麼事才是最重要的。客觀地看,他的妻子和兒子才是最重要的,這才叫成熟。

[引用版主回覆] | 作者 不敗的魔術師 | 25-Jul-11 12:39